የወረዳው ስም ስያሜ

   የእነሞርና ኤነር ወረዳ ምክር ቤት ግንቦት 2 / 2014 ዓ.ም  ባካሄደው 5ኛ ዙር 8ኛ ዓመት 30ኛ መደበኛ ጉባኤ ወረዳው ቀደም ብሎ እነሞርና ኤነር ተብሎ ሲጠራበት የነበረው ስያሜ በመቀየር <<እኖር>> ወረዳ በሚል ሰየመ ፡፡ ምክር ቤቱ ዛሬ ባካሄደው መደበኛ ጉባኤው የእነሞርና ኤነር ወረዳ ይጠራበት የነበረውን ስያሜ በመቀየር እኖር ወረዳ በሚል አንዲሰየም በሙሉ ድምጽ አጽድቋል ፡፡ ነባሩ የእነሞርና ኤነር ወረዳ በተሰጡ የህዝቡ የአደረጃጀት ጥያቄዎች ምላሽ ምክንያት በስሩ ሲተዳደሩ ከነበሩ አካባቢዎች ራሳቸውን ችለው በወረዳና ከተማ አስተዳደር የተደራጁ በመኖሩ ምክንያት በቀረው ወረዳ ስር ያሉ ህዝቦችን ሊገልጽና አንድ ሊያደርግ የሚችል ስያሜ መስጠት በማስፈለጉ መሆኑን ገልጸዋል፡፡ የቀድሞ እነሞርና ኤነር ወረዳ ስያሜውን በመያዝ 40 የገጠርና 3 የከተማ በድምሩ 43 ቀበሌዎች በስሩ ይዞ የዞኑ አንድ ወረዳ በመሆን ተግባራትን በመምራት ላይ ይገኝ ነበር ፡፡ የወረዳው አመሰራረትና ስያሜ በተመለከተ ከወረዳውና ከጉንችሬ ከተማ አስተዳደር የተውጣጡ ወረዳውን ከዚህ ቀደም ሲያገለግሉ ከነበሩ አባቶች ጋር ውይይት መደረጉን የጠቆሙት አቶ ትዛዙ ወጥ የሆነ ትርጉም ባይኖረውም ወረዳው ከ1967 ዓ.ም በፊት << እኖር>> ተብሎ ሲጠራ እንደነበር ከተደረጉ ውይይቶች የተገኙ መረጃዎች ያመለክታል ብለዋል፡፡ በሂደትም በ1967 ዓ.ም በወቅቱ የነበረው አመራር ከህዝቡ ጋር ውይይት ሳይደረግ እኖር የሚለውን ስያሜ በመቀየር እነሞርና ኤነር በሚል የተጠራ መሆኑን አባቶች እንደሚናገሩ በጥናቱ ተገልጿል፡፡ በተጨማሪም ወረዳዎቹ በአዲስ ከመደራጀታቸው የተነሳ የወረዳዉን ጥቅም በማያሳጣና ህዝቦችን ሊወክልና ሊያስማማ የሚችል ስያሜ እንዲሰጥ ሀሳብ ማንሳታቸው በሰነዱ ተመላክቷል፡፡በዚህም መሰረት የወረዳው ስያሜ <<እኖር>> ሊባል እንደሚገባ ማመላከታቸውን ተብራርቷል፡፡ ወረዳውን በተመለከተ የተጻፉ መጽሃፍት/ጎጎት/ እንደሚያስረዱት እኖር በተወላጆችና በአጎራባች ወይም በተቀረው የጉራጌ ህ/ሰብ ዘንድ እኖር በሚል ስያሜ ሲጠራና በዚህ ስያሜ ሲታወቅ ቆይቶ የአጼ ሚኒሊክ ሃይል ጉራጌን ከተቆጣጠረ ወዲህ በነበሩ ሁኔታዎች አማካኝነት አማርኛ በእኖር ቋንቋ ጣልቃ በመግባት ባሳደረው ተፅዕኖ ምክንያት<< እኖር>> የሚለውን ስያሜ << እነሞር>> በሚለው እንዲለወጥ መደረጉን ያስረዳሉ፡፡ በተለይም ከስያሜ ለውጥ ጋር ተያይዞ የሚነሱ የአመለካከትና የግንዛቤ ጥያቄዎች በሚመለከት በመድረኩ በሰፊው ማብራሪያ ተሰጥቷል፡፡ የወረዳው ዋና አስተዳዳሪ አቶ ያዕቆብ እንደተናገሩት በተደረጉ የአደረጃጀት ለውጦች ምክንያት ሚቄ ማእከል ያደረገው ወረዳ ስያሜውን << እኖር ኤነር>> በሚል ከተሰየመ በኅላ በሚኖሩ የተለያዩ ውይይቶችም ሆነ የስራ እንቅስቃሴዎች እኖር ኤነር እና እነሞር ኤነር በሚሉ ስሞች ምክንያት የሚቸገሩ አካላት በግልጽ መኖራቸውን አስረድተዋል ፡፡ አቶ ያዕቆብ አክለውም ምንም እንኳ ለዘመናት በወንድማማችነትና በአንድነት የዘለቁ ቢሆኑም <<እኖር>> እና <<ኤነር>> በተለያየ አካባቢ የሚኖሩና የኤነር አካባቢ ህዝቦች ሙሉ በሙሉ በአዲሱ እኖር ኤነር መገር ወረዳ ስር በመካለላቸው የወረዳው ስያሜ ማስተካከል እንደሚገባ ጥናቱ መነሻ በማድረግ አስገንዝበዋል፡፡ በመጨረሻም ከምክር ቤት አባላት መካከል አንዳንዶቹ በሰጡት አስተያየት የስያሜ ለዉጥ መደረጉ ተገቢና ወቅቱን ያገናዘበ በመሆኑ የስም ለውጥ መደረጉ አስፈላጊ መሆኑ ጠቁመዋል ሲል የዘገበው የወረዳው የመንግስት ኮምዩኒኬሽን ጉዳዮች ጽ/ቤት ነው፡፡ የእነሞርና ኤነር ወረዳ ምክር ቤት ባካሄደው 5ኛ ዙር 8ኛ ዓመት 30ኛ መደበኛ ጉባኤ ወረዳው ቀደም ብሎ እነሞርና ኤነር ተብሎ ሲጠራበት የነበረው ስያሜ በመቀየር <<እኖር>> ወረዳ በሚል ሰየመ፡፡